Tips Tricks And Tutorials

تابع عبر البريد الإلكترونى:

Widget by our
التسجيل

أهلا وسهلا بك إلى Oursons.

If this is your first visit, be sure to check out the FAQ by clicking the link above. You may have to register before you can post: click the register link above to proceed.

+ الرد على الموضوع
النتائج 1 إلى 2 من 2

الموضوع: نصائح قيمة لزوار معرض الكتاب

              
    Bookmark and Share
  1. #1

    نصائح قيمة لزوار معرض الكتاب

    النصيحة الأولى: لازم تكون مجهز قايمة كتب تشتريها.. مينفعش تنزل المعرض كده وانت سايب الأمور للظروف وإلا هتفلس فى أول مكتبة هتدخلها ومش هتعرف تجيب الكتب اللى انت عايزها..ابدأوا من دلوقتى جهزوا قوائم ومتهملوش الموضوع لأنه مهم فعلا
    ودي قائمة مساعدة من إعداد فريق عمل مكتبة قصر العيني للاستعارة

    [فقط الأعضاء المسجلين والمفعلين يمكنهم رؤية الوصلات. ]


    أمّا عن النصيحة التانية للناس اللى ناوية تروح المعرض فهى:فى مكتبات فى المعرض فيها كنوز حقيقية، وكتب قيمة جدا وأسعارها مفيش تقريبا .. المكتبات دى زى:الهيئة العامة للكتاب: هتلاقوا فيها اعمال ناس عظيمة فعلا وأسعارها جنيهات قليلة جدا .. وكمان بيكونوا عاملين خصم مكتبة مصر: فيها اعمال نجيب محفوظ كلها ويوسف ادريس والسباعى وجودة السحار وغيرهم .. صحيح اعمال نجيب محفوظ اشترتها الشروق خلاص لكن كل سنة مكتبة مصر بتستهبل وتطبع منها وتنزل فى المعرض بس لازم تروحوها بدرى عشان تلحقوا الكلام ده لأنه بيتخطف خطفدار الهلال .. ودار المعارف .. نهضة مصر ( أغلى حبة لكن ارخص مقارنةً بالمكتبات التانية ) فيها عبقريات عباس العقاد .. كانت ب 7 جنيه السنة اللى فاتت نيجى للنصيحة التالتة للناس اللى رايحة معرض الكتاب النصيحة دى تخص سور الأزبكية ف ركزوا شوية معايا أولًا فى سورين أزبكية.. واحد فى العتبة ( ده مقره الثابت ) وواحد فى معرض الكتاب.. طب ايه الفرق بينهم ؟ الأول ده هتلاقوا فيه كتب جديدة وقديمة .. هتلاقوا فيه الكتب المشهورة كلها تقريبا .. اسعاره حلوة طبعا .. والكتب اللى عندهم بتتجدد أول بأول.. التانى ده بيكون عليه رقابة شديدة حبتين ف مش هتلاقوا عندهم كل حاجة.. هتلاقوا عندهم كتب مستعملة وقديمة حبتين .. وقليل منهم اوى اللى هتلاقوا عنده كتب جديدة عرف يهربها لجوا المعرض طيب ايه اللى هستفيده من الموضوع ده؟ اللى هستفيده إنى لازم أعمل زيارة سريعة لسور الأزبكية اللى فى العتبة قبل المعرض ويكون معايا القايمة بتاعتى .. اجيب منها اللى ألاقيه هناك لأن أسعارهم أرخص بكتير جدا من المعرض.. واللى ملاقيهوش ابقى اجيبه من المعرض بقى.. ده بالنسبة للكتب الجديدة ( مش معنى جديدة إنها لسه نازلة .. لأ جديدة أقصد بيها اللى نزلت الفترة اللى فاتت ) ... إنما الإصدارات اللى لسه نازلة فى المعرض دى هتلاقوها فى المعرض بس النصيحة الخامسة للناس اللى ناوية تنزل المعرض النصيحة دى مهمة جدا جدا جدا جدا جدا جدا جدا جدا جدا للكل، وخاصةً الناس اللى بتيجى من محافظات تانية ف ركزوا الله يكرمكم تانى سبت فى المعرض كل سنة ( السنادى هيوافق 7 فبراير ) بيكون فيه حفلات توقيع لكل الكتاب اللى ممكن تتخيلهم تقريبا .. احمد خالد توفيق ويوسف زيدان واحمد مراد وعمر طاهر وابراهيم عبد المجيد وكتاب تانى كتير جدا.. اليوم ده ميتفوتش يا جماعة الناس اللى ناوية تيجى مرة واحدة .. يا ريت تيجوا على نفسكم شوية ومتنزلوش أول يومين فى المعرض وتضيعوا الفرصة دى على نفسكم .. استحملوا أول اسبوع كده وانزلوا تانى اسبوع فى اليوم ده
    النصيحة السادسة عن معرض الكتاب، الخصومات يا إخواننا .. ناس كتير كانت بتسأل على المكتبات اللى بتعمل خصومات وأد ايه الخصومات دى .. وبالتالى ركزوا شوية اولا: معظم المكتبات فى المعرض بتعمل خصومات فعلا.. فى مكتبات بيفضل الخصم ده طول فترة المعرض، وفى مكتبات بتعمل الخصم ده فى يوم بيكونوا عاملين فيه حفل توقيع مثلا..المكتبات اللى بتعمل خصومات دى هى:مكتبة تنمية.. بتعمل خصم 20% .. تنمية دى فيها كل ما تشتهيه الأنفس وتلذ الأعين تقريبا .. وخاصة للناس اللى بتحب الأدب المترجم .. هتلاقوا فيها إصدارات كتير جدا لدور النشر العربية والمصرية .. اى حاجة مترجمة مش لاقينها فى حتة روحوا اسألوا عنها فى تنمية الأول. دار الربيع العربى .. دول بقى نازلين بحبة كتب زى الفل .. عندهم اصدارات جديدة عظيمة بجد .. الشروق ومدبولى بيعملوا خصومات 20 % برضو .. المركز القومى للترجمة: ده بيعملك خصم 50 % اول ما يشوف كارنية الكلية بتاعك .. الموضوع ده حتى فى الايام العادية .. وعندهم كتب قيمة جدا مترجمة واسعارها حلوة .. "هكذا يتكلم زرادشت" اللى هو أهم كتب نيتشة عندهم ب 12 جنيه تقريبا ( كنت جايبه قبلها ب 100 جنيه من مكتبة تانية )الهيئة العامة للكتاب: اعتقد بتعمل خصم من 10 ل 20 % .. لكن مش فاكر الرقم بالظبط ... ودى اصلا الكتب فيها رخصية .. انا كنت بروح ب 100 جنيه بجيب شوال كتب واروح فيها كتاب طبائع الاستبداد بتاع الكواكبى ب 8 جنيه .. كنت اشتريته قبلها من مدبولى ب 28 جنيه مكتبة مصـر .. دى فيها اعمال الناس القديمة زى ما قلنا .. بتعمل خصم من 10 ل 20 % برضو .. لكن مش فاكر الرقم بالظبط.. فيها اعمال نجيب محفوظ وادريس والسباعى وجودة السحار وعلى احمد باكثير وغيرهم..مكتبة دار السلام: دى اكبر دار نشر للكتب الدينية.. هتلاقوا فيها كل ما تتخيلونه تقريبا فى هذا المجال .. حتى اللى عايز كتب دينية إنجلش هتلاقوها هناك لأنهم بيتعاملوا مع ماليزيين ومسلميين اجانب..مكتبة الجامعة الأمريكية: دى اعتقد شغالة فى الانجلش بس .. بيعملوا خصم كويس جدا برضو.المؤسسة العربية الحديثة: ودى بقى للناس اللى بتحب سلاسل دكتور احمد خالد توفيق ونبيل فاروق والناس دى.. برضو مش فاكر الخصم كان كام بالظبط للأسف النصيحة السابعة للناس اللى رايحة المعرض ضرورة إننا نزور سور الأزبكية ( او النبى دانيال لو احنا من اسكندرية ) قبل المعرض عشان نشوف الكتب الموجودة إيه ونجيبها بدل ما نجيبها من المعرض وندفع الشئ الفلانى انا عايز أقولكم إنكم هتتفاجئوا من مقدار الاحترافية اللى وصلها أصحاب المكتبات فى سور الأزبكية.. الناس بقت فعليًا تضرب الكتاب قبل ما ينزل المكتبات ده غير إنهم وسّعوا مداركم وبقوا يهتموا بالأدب العالمى كمان مش المصرى والعربى بس.. بقوا يضربوا روايات ميلان كونديرا وهاروكى موراكامى وأمبرتو إيكو وحتى الكلاسيكيات القديمة مسلمتش منهم .. شغالين زى المنشار يعنى ما شاء الله ودى طبعا حاجة تسعدنا جدا حاجة كمان بقى .. شرا الكتب من سور الأزبكية يتمثل فى ركيزتين مهمتين:1- إوعى تعرف البياع ده إنك عايز الكتاب الفلانى لأنه لو عرف هيضربلك أرقام عالية ومش هتعرف تاخد السعر اللى انت عايزه .. الصح إنك تلف على الكتب كلها قال يعنى بتدور على اى حاجة وخلاص.. وفى النهاية ابقى اختار كتاب ( اللى انت عايزه ) وقوله ده بكام .. هارش ؟ 2- الركيزة التانية هى الفصال.. فاصل للصبح ( صحيح موضوع الفصال فى سور الأزبكية اللى فى المعرض مبيكونش متاح أوى لكن حاول ) إنما الفصال فعلا بيكون فى سور الأزبكية اللى فى العتبة.. لو البياع مش عاجبك سيبه وامشى وروح لغيره وهتلاقيه بينادى عليك .. اهم حاجة متسيبوش يضحك عليك فهمتوا حاجة ؟ طيب الحمد لله

    النصيحة التاسعة فيما يخص معرض الكتاب والناس اللى ناوية تروح هنا حبة أمثلة لكتب قيمة جدا ورخيصة جدا موجودة فى بعض مكتبات المعرض .. هاتوا ورقة وقلم واكتبوا
    الهيئة العامة للكتاب:

    1- سلسلة الجوائز .. دى روايات مترجمة حاصلة على أعلى الجوائز الأدبية العالمية .. الروايات دى ترجمتها ممتازة وأسعارها رخيصة جدا وطبعاتها نضيفة بجد .. هتلاقوا فيها اعمال ساراماجو .. اعمال ل اورهان باموق .. وارنست هيمنجواى .. وفيها روايات عظيمة كتير جدا.. حتى لو مش هتقروها هاتوها برضو .. بتخلى شكل المكتبة حلو جدا
    2- الكوميديا الإلهية لدانتى.. ال 3 كتب ب 40 جنيه تقريبا
    3- الاعمال الكاملة لصلاح جاهين .. المقالات والأشعار والاعمال الكاريكاتيرية
    4- الاعمال الكاملة لصلاح عبد الصبور
    5 الاعمال الكاملة لمحمد البساطى
    6- الاعمال الكاملة لفؤاد حداد
    7- كتاب "طبائع الاستبداد ومصارع الاستعباد" ل الكواكبى
    8- رواية "جوع" لمحمد البساطى ( وصلت للقائمة القصيرة لجايزة البوكر )
    9- تاريخ الفلسفة الغربية ( 3 كتب )
    10- الاعمال الكاملة ل احمد فؤاد نجم ( ب 12 جنيه )
    11- عاشوا فى حياتى لأنيس منصور
    12- بعض المجلدات من اعمال ديستوفسكى
    13- مذكرات شارلى شابلن
    14- مذكرات نجيب الريحانى واعمال تانية كتير

    نهضة مصر:
    1- سلسلة هارى بوتر مترجمة .. ورخيصة جدا 2- عبقريات عباس العقاد .. 3- كتب كتير تانية للعقاد وأنيس منصور
    مكتبة مصر :
    1- اعمال نجيب محفوظ ( اتخن رواية مش هتزيد عن 10 جنيه ) 2- اعمال يوسف ادريس 3- اعمال يوسف السباعى4- بعض اعمال المنفلوطى5- اعمال جودة السحار6- اعمال على احمد باكثير
    سور الازبكية .. كتب مستعملة كتير جدا وأسعارها بين جنيه و2 جنيه

    مكتبة ديوان:
    يُقال والله اعلم إنهم فى أول يوم بينزلوا كتب إنجلش مستعملة بتكون أسعارها رخيصة جدا وحالتها ممتازة.. مش متأكد من المعلومة



    النصيحة العاشر ة للناس اللى ناوية تروح معرض الكتاب الناس اللى بتدور على الأدب الغير عربى ( سواءً مترجم أو لأ )..
    اولا المترجم:
    إحنا عندنا أكتر من مصـدر نقدر نجيب منهم روايات وكتب مترجمة.. أرخصهم سور الأزبكية طبعا لكن مشكلة السور إن فيه الكتب المشهورة أوى فقط .. الكتب اللى بتطلب كتير يعنى ... زى مثلا: -بعض الكلاسيكيات زى البؤساء وأنا كارنينا واحدب نوتردام وشوية اعمال لديكينز وشكسبير -بعض اعمال أجاثا كريستى -ألعاب الجوع ( hunger games ) بأجزاءها .. اجزاء twilight كلها .. اجزاء divergent .. -روايات دان براون كلها.. كتب التنمية البشرية المشهورة زى العادات السبع .. -روايات جورج أورويل ( مزرعة الحيوان .. 1984 ) .. بس اوعى حد يمسكك بيهم دول -بعض روايات كونديرا : كائن لا تحتمل خفته .. الحياة فى مكان آخر .. غراميات مرحة ( الراجل ده اللى مقرالوش يبقى مقراش قبل كده )-بعض روايات هاروكى موراكامى: رقص رقص رقص .. سبوتنيك الحبيبة .. كافكا على الشاطئ ( اسلوبه سهل جدا وكله فانتازيا .. من الناس اللى اتهروا ترشيح لنوبل )-بعض روايات ستيفين كينج طبعا .. - زوربا اليونانى بتاعت كزانتزاكيس .. واسم الوردة ( اللى اتهموا يوسف زيدان انه سرق منها عزازيل ) بتاعت أمبرتو إيكو .. 451 فهرنهايت بتاع راى برادبرى.. ده غير كتب إليف شافاق طبعا المشهورة جدا زى قواعد العشق ولقيطة اسطنبول وشرف لو الكتب اللى انت عايزها مش ضمن الكتب دى، وإنت محتاجها اوى، يبقى عليك وعلى مكتبة تنمية .. فى كمان المركز القومى للترجمة .. ده مقره الثابت فى محطة مترو الأوبرا .. بيعمل خصومات 50 % للطلبة .. وبيكون موجود فى السور وهتلاقوا فيه كتب مشهورة جدا واسعارها حلوة..أمّا الناس اللى حابة تقرأ الكتب بالانجلش ف دول ليهم كذا مصدر برضو .. أشهرهم برضو سور الأزبكية .. وبرضو هتلاقوا فيه الروايات المشهورة جدا جدا .. غير كده مش هتلاقوا حاجة المصدر التانى هو مكتبة الديوان ( ربنا يكفينا شرها ) .. بيقولوا بيكون فيها أول يوم كتب مستعملة بأسعار حلوة وطبعا فيها كتب إنجلش مش مستعملة .. بس دى أجاركم الله على سعرها ( رواية mr mercedes بتاعت ستيفين كينج ب 230 جنيه فيها )المصدر التالت هو مكتبة الجامعة الأمريكية .. فيها كتب إنجلش ممتازة وبيعملوا خصومات مش بطالة النصيحة رقم 11 للناس اللى ناوية تروح معرض الكتاب ناس كتير بتسأل: نشترى إزاى ؟ نعدى على مكتبة واحدة وخلاص ونسأل فيها ؟ والا نعدى على كل المكتبات ونشوف ايه النظام ؟بص يا سيدى .. قبل ما أجاوبك على السؤال ده حابب أحدد كام نقطة كده:- فى حاجة اسمها كتب قديمة ( بقالها عشرات السنين .. زى كتب نجيب محفوظ وادريس والسباعى والناس دى ) .. - وفى حاجة اسمها كتب جديدة.. ودى نوعين :1- الكتب اللى نازلة بقالها سنين قليلة .. او اللى نزلت قبل المعرض بشهور قليلة .. ودى هتلاقوها فى أغلب المكتبات .. بالذات لو كتب لناس مشهورين.. يعنى مثلًا كتاب د/أحمد خالد توفيق الجديد "شربة الحاج داود" ده هتلاقوه فى كل المكتبات تقريبا .. رواية المنسى قنديل " كتيبة سوداء " .. "ذئاب يلوستون" بتاعت شيرين هنائى .. وزيهم كتب تانية كتير ف لما نحب نشترى النوعية دى من الكتب نشتريها من المكتبة اللى عاملة خصم أكبر وكده نوفر مبلغ محترم 2- كتب نازلة على المعرض طازة .. منزلتش فى أى حتة قبل كده .. اول مرة اتعرضت فى المكتبات كانت أول ايام المعرض .. والنوعية دى من الكتب ( غالبا ) بتكون فى المكتبات اللى أصدرتها بس .. بمعنى، إن رواية نازلة عن دار اكتب مثلًا مش هتلاقوها غير فى دار اكتب بس .. ف النوعية دى من الكتب هتجيبوها من دور النشر بتاعتها فى المعرض ما عدا طبعا كتب الناس التقيلة برضو زى د/احمد خالد توفيق مثلا .. يعنى د/أحمد نازله رواية عن الشروق اسمها "مثل إيكاروس" اعتقد هتكون موجودة فى كل المكتبات مش فى الشروق بس، وبالتالى يطبق عليها نفس الكلام بتاع الكتب اللى فى رقم 1 فهمتوا أى حاجة من الكلام ده ؟ انا شخصيًا مش فاهم

    النصيحة رقم 12 للناس اللى ناوية تروح المعرض 1- فى حاجة اسمها الهيئة العامة للكتاب .. دى اتكلمنا عنها وقولنا إنها بتصدر سلسلة الجوائز.. لكن فى حاجة تانية اسمها الهيئة العامة لقصور الثقافة، ودى بتصدر حاجة مشابهة اسمها "سلسلة المائة كتاب" .. إيه بقى حوار "المائة كتاب" ؟ دول عبارة عن ترجمة لروائع الأدب العالمى .. يعنى هتلاقوا مثلا فى السلسلة دى:دون كيخوتة ل ثيرفانتسالمسخ والمحاكمة ل كافكا1984لجورج أورويل الصخب والعنف لفوكنر الأشياء تتداعى ل تشينوا أتشيبيالأغانى الغجرية لـ لوركا فى قلب الظلام لجوزيف كونراد زوربا اليونانى لنيكوس كزانتزاكيس

    التراجم ممتازة يا جماعة.. والطبعات نضيفة جدا وزى الفل وحاجات تانية مبهرة بجد .. وكلها بأسعار تقترب من ببلاش السنة اللى فاتت، قصور الثقافة كانت محشورة فى خيمة من خيم المعرض ومستخبية كده على عكس الهيئة العامة للكتاب ف يا ريت تبقوا تدوروا عليها كويس2- دار المعارف .. ودى فيها شوية حاجات للناس اللى بتحب طه حسين واسعارها صغيرة برضو واعتقد فيها كتب للأطفال كتير جدا عشان الناس اللى كانت بتسأل..

    النصيحة رقم 13 للناس اللى ناوية تروح معرض الكتاب طبعا الناس اللى راحت قبل كده معرض الكتاب اشتكوا كتير جدا من التوهان اللى بيحسوه وهم فى المعرض .. وده صحيح جدا .. إن مكنتش تروح المعرض ده 4 مرات على الاقل كل سنة مش هتفتكر فيه اى حاجة .. وهتتوه وهتبقى ليلتك منيلة بنيلةطبعا انا حاولت ارسم خريطة كروكى كده بإيدى لكن فشلت فشل زريع .. ف نزلت صورة لمعرض الكتاب بتاع السنة اللى فاتت وحطيت فيها التاتش بتاعتى فى البداية بس حابب أقول إن الخريطة دى بتعتمد على إن اماكن المكتبات متغيرتش عن السنة اللى فاتت.. لندعُ الله ان المكتبات تفضل فى اماكنها انظر معى فى الرسم الموضح أسفله:رقم 1 ده المدخل .. هو مش مدخل واحد الحقيقة، هم 3 مداخل جمب بعض .. ودول اللى سواق الميكروباص اللى بيوصلك المعرض بينزلك عندها.. بتدفع تمن التذكرة برة ( جنيه واحد ).. وتدخل .. كده المعرض كله قدامك يا معلم ماذا بعد ؟ هتلاقى مكتبات على اليمين ومكتبات على الشمال.. خلينا نبدأ بالشمال لأنى فاكرهم كويس هتلاقيهم بالترتيب كالآتى: مدبولى الشروق مكتبة مصر العبيكان دار السلامطيب بص كده على اليمين: مدبولى ( ليهم جزء تانى فى اليمين .. ) نهضة مصرالمصرية اللبنانية جرير تنميةللأسف ترتيب اليمين ده احتمال يكون فيه خطأ، واحتمال يكون فى مكتبات موجودة فى النص انا مش فاكرها، لكن انا واثق إن المكتبات دى موجودة فى الناحية اليمين فعلا.. مكانها فين بقى بالظبط ؟ مش هتفرق لو مشيت على طول من غير ما تبص يمين ولا شمال هتلاقى فى وشك كشك كبير حبتين .. ده بتاع دار ( ن ) .. وهتلاقى جمبه سلم ( رقم 2 فى الصورة ) .. السلم ده بيوصلك لمنطقة الخيم أو الصالات ( رقم 3 فى الصورة ) .. هتلاقى صالة 1 وصالة 2 وصالة 3 وصالة 4 .. ماسورة صالات ضربت فى المكان الصالات دى بقى مليانة مكتبات .. الرواق وليلى والربيع العربى والمركز القومى للترجمة والديوان وألف وهيئة قصور الثقافة والهيئة العامة للكتاب ودوّن ومدارات وغيرهم وغيرهم.. للأسف مش عارف انهى مكتبة فى انهى صالةطب وبعدين ؟ خلصت لف فى الصالات ؟ طيب اخرج منها وارجع السلم اللى نزلت منه.. واخد شمالك لحد ما توصل لرقم (5) .. وامشى على طول الطريق ده بحيث تكون رقم 5 ورقم 4 ورقم 6 على يمينك .. فاهم حاجة ؟ رقم (4) دى بقى فرع تانى للهيئة العامة للكتاب.. وجمبه فرع للمؤسسة العربية الحديثة ( بتاعت رجل المستحيل وما وراء الطبيعة ). وجمبهم دار أطلس ( بتاعت عمر طاهر ) طيب إيه رقم (5) ورقم (6) دول ؟ بص هو كان فى كافيتريا بتبيع اكل فى منطقة من المنطقتين دول .. طيب فاضل رقم (7) .. ده ايه ؟ ده سور الأزبكية هتلاقيهم فارشين هناك كده ان شاء الله .. ودول مكانهم المفروض انه مبيتغيرش معلش الصورة مش واضحة اوى، والشرح معقد حبتين، لكن ده اقصى حاجة قدرت اعملها
    النصيحة رقم 14 للناس اللى ناوية تنزل المعرض عايزين نلخص كل الكلام اللى فات بقى عشان انا سامع صوت لطم وصويت والناس مبقتش فاهمة حاجة المعرض جاى ؟ ايوة جاىهنجهزله ازاى بقى ؟ قولنا على خطوات نمشى عليها عشان اتخنقنا من الحوار ده!! حاضر كيف تجهز لمعرض الكتاب فى 9 خطوات:1- تحوش فلوس كتييير .. كتير بغباء .. على أد ما تقدر .. وزى ما اتفقنا، كله حلال، والله غفور رحيم 2- تجهز قايمة الكتب اللى انت عايز تجيبها .. القايمة لازم تشمل التلات عواميد دول: الأول: اسم الكتاب التانى: اسم الكاتبالتالت: دار النشرويا ريت ترتب الكتب فى القايمة دى من الأهم للأقل أهمية، بحيث يكون فى أولوليات..3- قبل المعرض بيومين تنزل سور الأزبكية/النبى دانيال وفى إيدك القايمة بتاعتك وتدور على الكتب اللى انت عايزها.. دوّر كويس اللى تلاقيه اشتريه .. وزى ما قلنا: فااااااااااااصل كتيير 4- المعرض بدأ.. اول ما تصحى من النوم إلعب 10 بطن على 10 ضغط لزوم النشاط وإلبس هدومك وتوكل على الله انطلق القايمة لسه معاك ؟ تمام .. اشطب منها بقى الكتب اللى جيبتها من السور..5- وصلت المعرض.. تمام .. اطلع على صالة 2 وخد كارت الخصومات بتاع عصير الكتب .. اللهى ربنا ينجحلهم المقاصد يا رب على المجهود اللى عملوه 6- روح على سور الازبكية والهيئة العامة للكتاب وخد فكرة عن الكتب الموجودة هناك.. الكتاب اللى تلاقيه اشطب عليه من القايمة 7- بص فى كارت الخصومات اللى معاك.. أيه اكتر مكتبة عاملة خصومات ؟ المكتبة دى اطلع عليها على طول .. وطبعا لسه القايمة فى ايدك اسأل على الكتب اللى عايزها، واللى تلاقيه اشتريه واشطب عليه من القايمة 8- فاضل كتب لسه ؟ شوف المكتبة اللى بعد كده فى الخصومات واسأل فيها على الكتب .. لو لقيتهم كان بها، ملقيتهمش ادخل على المكتبة اللى بعدها .. وهكذا9- برضو لسه فاضل كتب ؟ انت لسه معاك القايمة طبعا .. والقايمة فيها اسماء دور النشر .. اطلع على دور النشر دى يا معلم واسأل هناك على الكتب دى وبكده تكون خلصت قايمتك يا بيه.. وكله بالحب لو لقيت وقت بعد كل ده بقى، وكان فاضل معاك فلوس ممكن تلف عشوائى كده وتبص على الكتب المعروضة يمكن حاجة تانية تعجبك ف تشتريها والله الموفق والمستعان



    مواعيد حفلات توقيع دار الشروق: الجمعة 30 يناير - 4 عصرا: حنان الجوهري (مؤلفة كتاب "ضل حيطة")السبت 31 يناير - 4 عصرا: أحمد خالد توفيق ..الأحد 1 فبراير - 5 مساء: يوسف زيدانالاثنين 2 فبراير - 4 عصرا: أحمد سمير (مؤلف "مانشيتات يوم القيامة")الخميس 5 فبراير - 5 مساء: محمد المنسي قنديل (وروايته الجديدة "كتيبة سوداء")الجمعة 6 فبراير - 4 عصرا: وجدي الكومي (وروايته الجديدة "إيقاع")السبت 7 فبراير - 4 عصرا: حسن كمال (وروايته الجديدة "الأسياد")السبت 7 فبراير - 6 ونصف مساء: أحمد مرادالاثنين 9 فبراير - 5 مساء: نهى الجندي (مؤلفة "اعرف ابنك وعلم عليه")الاثنين 9 فبراير - 6 مساء: يمنى خطاب (مؤلفة "فيديو تسعيناتي")الاثنين 9 فبراير - 7 مساء: نسمة جويلي (مؤلفة "إرث الحكاية")الثلاثاء 10 فبراير - 4 عصرا: هيثم دبور


    النصيحة رقم 19 يا بشر ياللى ناويين تروحوا معرض الكتاب امبارح تم الاعلان عن القائمة الطويلة لجائزة البوكر .. وكان فيها 16 رواية .. الناس اللى متعرفش رواية "البوكر" أحب اقولكم إن دى المفروض إنها اعلى جائزة بتمنح لرواية عربية .. يعنى دى ارقى جائزة فى الأدب العربى تقريبا، وبالتالى الاعمال الفائزة بيها بتاخد صيت محترم وبتترجم للغات كتير وبيكون عليها اقبال عظيم..طيب انا بقولكم كده ليه ؟ بقولكم كده عشان تحطوا ال 16 رواية دول فى اعتباركم وانتوا نازلينن المعرض وتضيفوهم لقوائمكم لأنهم فعلا هيستحقوا القراية ملحوظة أخيرة مهمة للغاية، وربنا يسامحنى على الجرم الفظيع اللى بعمله فى حق دور النشر ده.. الناس اللى فى سور الأزبكية بقوا ينزلوا اعمال جايزة البوكر دى كلها .. والسنة اللى فاتت كان عندهم كل الروايات اللى اترشحت للقائمة الطويلة تقريبا .. ف يا ريت اللى مش معاه فلوس او غلبان زيى كده يستنى كام يوم كده وهتلاقوهم نزلوا سور الازبكية


    نصيحة رقم 20 يا اخوانا ياللى رايحين المعرض


    النصيحة دى موجهة بالدرجة الأولى للناس اللى رايحة المعرض مرة واحدة.. دول بالذات يركزوا حبة


    دلوقتى كلنا عارفين إن المعرض ده واسع جدا وكبير جدا .. ومن رابع المستحيلات إنك تلفه بالكامل .. حتى لو روحت كذا مرة طيب انت دلوقتى رايح المعرض مرة واحدة فلازم خطة تمشى بيها بحيث تخلص كل اللى عايز تخلصه فى المرة دى


    النقطة التانية.. الناس اللى بيروحوا فى مجموعات .. .. عشان خاطرى لو خطتكم بتتعارض مع بعض .. والكتب اللى عايزين تشتروها مش هتكون من نفس المكتبات يبقى تفرقوا وكل واحد يدور على الحاجة اللى عايز يجيبها الاول .. مش لازم نروح كلنا مع واحد منا .. وبعد ما يخلص نروح مع اللى بعده .. لو عملنا كده مش هنلاقى وقت خالص واليوم هيخلص من غير ما نحس وفى النهاية يا سيدى لو فضل كام كتاب كده مشترك بينك وبينهم قابلهم تانى وروحوا اشتروهم سوا

    ولذلك، حابب اوجه من هنا رسالة للبنت اللى رايحة مع خطيبها او مع جوزها او مع حبيبها إلخ : لو فى خطتك تشترى كتب غير اللى هيشتريها حبيببك يبقى عشان خاطرى بلاش تكونى حالمة ولو ليوم واحد.. سيبى الراجل يخلص اللى عايز يخلصه وينجز قبل ما اليوم يخلص .. بلاش بقى جوا القمصة والزعل ده انه سابك تلفى لواحدك .. ويا ريت كمان متشتكيش لحماتك لما تروحى عشان الراجل هيشيلهالك طول عمره


    ولو خطتكم زى بعض وبتقراوا نفس الكتب يبقى مبروك عليكم .. ويا بخت من وفق راسين فى الكتاب







  2. # ADS
    Circuit advertisement
    تاريخ التسجيل
    Always
    المشاركات
    Many
     

  3. #2

 

 

معلومات الموضوع

الأعضاء الذين يشاهدون هذا الموضوع

الذين يشاهدون الموضوع الآن: 1 (0 من الأعضاء و 1 زائر)

Visitors found this page by searching for:

مذكرات نجيب الريحانى موجوده فى انهى مكتبه

SEO Blog

الكلمات الدلالية لهذا الموضوع

ضوابط المشاركة

  • لا تستطيع إضافة مواضيع جديدة
  • لا تستطيع الرد على المواضيع
  • لا تستطيع إرفاق ملفات
  • لا تستطيع تعديل مشاركاتك